خلاصة الفوركس - د/جمال ممدوح

[zero_cool725]

بسم الله الرحمن الرحيم
سوف اشترك بهذا الموضوع للمسابقة ان شاء الله

الفكرة هى فكرة احد الاخوة فى منتدى الجيران و قد قمت بذكر اسمه كعنوان للموضوع و هو الاخ الفاضل جمال ممدوح نظرا للمجهود المبذول من تجاهه و لبساطة الشرح الذى قدمه
ندخل بقى فى الموضوع علطول ان شاء الله من المشاركة الجاية ​

 

[zero_cool725]

<b> طبعا المقدمة دى على لسان الدكتور فلازم اقولها قبل ما ادخل فى الاستراتيجية كمان الغرض من الموضوع ده هو افادة الاعضاء
بغض النظر انا عارف انى كده كده مش هكسب المسابقة فيبقى استفدت انى فيه اعضاء استفادت هنا و بدانا نتشاور مع بعض للوصول الى اقصى ربح من الاستراتيجية دى​

الفكرة اللى هاطرحها هنا ومن غير تشويق عشان انا نفسى ماباحبش اللى بيعملوا كده​

ولا منقولة، ولا قريتها، ولا سمعت عنها من أى حد​

الفكرة فكرتى تماما ولله الحمد، واذا اى حد نقلها ياريت فقط يذكر المصدر مجرد إحقاقا للحق​

الموضوع مش اختراع ولا حاجة، إنما ملاحظة ومتابعة وسهر ليالى بالفعل​

بالمناسبة​

انا مش لسه هابتدى أجرب معاكم، أو حتى مجربها إسبوعين مثلا ومشيت معايا لا​

الموضوع ده انا شغال بيه بقالى 4 سنوات لايف (مش باك تيست) وعلى حساب حقيقى​

بس للأمانة القصوى هو فيه كمان حاجتين زيادة عن اللى هايتقال هنا تعتبر كل واحدة استراتيجية مستقلة من برمجتى الخاصة​

انما اللى هنا هو الاساس​

نبدأ بسم الله​

وأى متابع أهلا بيه، وأى مشارك ده موضوعه فى الأساس، وأى معترض ياريت يقفل الموضوع ويتابع موضوع أكثر أهمية من ده​

أنا فكرت انى أعمل الموضوع على حلقات، منها شرح ماهيّة الفوركس ومنها تمهيد للموضوع الأساسى مثلا حلقتين تلاتة تمهيد للمبتدىء عشان يتابع معانا بسلاسة وندخل فى صلب الموضوع من أول الإسبوع القادم بإذن الله تعالى​

يتبع ...​

********​

​

​

​

</b>

 

[zero_cool725]

<b>

ما هى أهم الأساسيات فى الفوركس؟​

هى كما اتفق الجميع، سواء عرب أم أجانب، مبتدىء أم خبير، هى الدعوم والمقاومات​

ده مافيهوش شك​

فما هى الدعوم والمقاومات كده سريعاً؟​

الدعم: هو منطقة سعرية لم يستطع السعر أن يتخطاها هبوطاً فى فترة من الفترات​

يعنى ايه الكلام ده؟​

يعنى السعر فضل نازل نازل نازل وماحدش بيقوله رايح فين ولا عارفين نوقفه

​

لحد لما وصل لمنطقة معينة وابتدى يظهر ناس توقفه عند حده​

سواء بقى يمشى بالعرض، أو يرتد صعود مباشر، المهم المنطقة اللى قدرت توقفه دى تسمى بمنطقة الدعم​

وبالعكس تماما لما يكون السعر طالع طالع لحد لما يقف أو يرتد نزولا تبقى دى منطقة مقاومة​

وطبعا من المعروف ان الدعم لما يتكسر (يتكسر يعنى السعر يقدر ينزل زيادة ويخترقه لتحت) بيتقلب لمقاومة​

وهكذا المقاومة لما تتكسر تصبح دعم​

كل ده كلام جميل​

بس قديم!!!​

وكل الناس عارفاه​

بالفعل كل الناس عارفاه، ولكن مين اللى شغال بيه؟؟؟ كله عاوز الحاجات اللى شكلها حلو وتزغلل فى الشارت، أو مؤشر يديله صوت يقوم من النوم ويدخل وهو مغمض

​

المهم​

ولكن اختلف الجميع فى كيفية تحديد هذه الدعوم والمقاومات​

فمنهم اللى قال اللى بالعرض افضل (بالعرض يعنى خط أفقى)، ومنهم قال اللى بالجنب (اللى هو خط الترند) وتفنّنوا فيه، وطلع فيه مقولات كتير (خليك مع الترند، اجعل الترند صديقك،Trend is my friend، مش عارف لو عاكست الترند هايحصلك ايه) ولكن...​

ازاى نرسم الترند؟؟​

يتبع ... غدا عشان ايدى وجعتنى​

**********​

​

</b>

 

[zero_cool725]

تفنن الناس فى كيفية رسم الترند وكل واحد يدافع عن اسلوبه ان هو ده الصح والباقى غلط، ويجيب من الشارت اللى يدعم كلامه، ولكن التانى بيعمل نفس الكلام، وما شاء الله الشارت مليان لده ولده​

​

فمنهم اللى بيرسمه على قاعين أو قمتين كفاية، ومنهم اللى بيقول لا لازم 3 قيعان أو 3 قمم حتى نعترف بإن ده ترند (انا لا مع ده ولا مع ده انا محايد)​

​

ومنهم اللى بيقول لازم نرسم خط الترند على الهاى او اللو للشموع، وأى اختراق للترند ولو بنقطة لابد من تعديل رسم الترند على الشكل الجديد​

​

ومنهم اللى بيرسم على الكلوز ولا يعترف بالهاى واللو تماما حتى لو اخترق الترند فيكون الترند سليما​

​

والمشكلة الكبرى فين بقى؟؟​

​

لما الصفقة تكسب يبقى ده العادى والترند تمام، ولما تخسر (طبعا بيبان بعدها) يقولك انت مش راسم الترند على القمم والقيعان مظبوط، ودى كده الرسمة الصح، طيب مانا ساعتها ماكنتش عارف انه هايعمل قاع مثلا اقل وعشان كده المقولة المشهورة (ما أسهل ان تكون محللاً بعد الحدث)​

​

فكيفية رسم الترند بالطريقة السليمة ليس متاحاً للجميع، وعشان كده الناس اتجهت للمؤشرات اللى بترسم الترند لوحدها (ولا تعليق)​

​

وطلع من هنا كمية استراتيجيات كتير زى الشغل على الارتداد أو الشغل على الاختراق فقط ولما كثر موضوع الاختراق الوهمى (كما يسمونه) عمل مؤشرات مساعده للترند لفضح الاختراق الوهمى مثل توليفة موفينج او استوك او آر اس آى وغيره من المساعدات​

​

وفيه اللى ساب ده كله واشتغل دعوم ومقاومات على شكل دوائر أو بيضاوى​

​

كل ده كويس على فكرة​

​

ومش غلط​

​

بالمناسبة، مافيش حاجة اسمها غلط فى الفوركس، كله كويس، وبيمشى، ولكن المهم هو هايمشى امتى (فى التذبذب ولا الترند)؟؟ ولفترة اد ايه (كل وقت وله نظامه)؟؟​

​

فأنا مش باقول على اى حاجة غلط، كل واحد وله طريقته المهم انه يكون بيقدر يكسب بيها معظم الوقت​

​

نرجع تانى للأساسيات​

​

الدعوم والمقاومات اللى انبثق منها الترند​

​

فيه ناس بتحب تتعامل معاها كخطوط افقية فقط ولا تتعامل مع الترند المائل (ومنهم أساتذة أجانب)، فيرسم خط من نقطة الدعم بالعرض وخط من نقطة المقاومة ويتعامل مع السعر من حيث الارتداد أو الاختراق زيه زى الترند العادى​

​

ولو تبص لأصل المواضيع كلها هاتلاقى ان الدعوم والمقاومات أو بمعنى آخر القيعان والقمم هم أصل كل شىء​

​

يعنى​

​

جان اللى مدوخ الناس بحركاته السحرية واللولبية كل اللى بيحاول يعمله انه يتنبأ بالقمة القادمة أو القاع القادم من خلال السابق​

​

اليوت ونظرياته واسلوب العدّ اللى اختلف فيه الكثيرون، ما هو الا نفس الشىء، فالموجة اللى بتجرى ورا الموجة عبارة عن قمة أو قاع​

​

وغيره من فايبوناتشى، وفايبوناتشى اكستنشن والنسب الذهبية لإيجاد القمة القادمة أو القاع المحتمل​

​

ومنها انبثق الهارمونيك بأشكاله ليتوقع نفس الشىء​

​

يبقى الفكرة واحدة ولكن كل واحد بيختار حسب شخصيته​

​

يعنى فيه ناس بتحب الغموض والكلكعة ومعادلات سحرية وجان (مع الاحترام للكل) بس القصة ابسط بكثيييييير​

​

وعلى فكرة قبل ما حد من المؤيدين للحاجات دى يهاجمنى ، انا دارس اليوت كويس اوى اوى وعارف جان وناقشت واحد كان عامل كتاب عن جان وبيبيعه ب 110$ وطلعت له حاجات فى معادلاته غلط لدرجة انه ماكانش مصدق​

​

فأنا مش معترض عليهم، والا ماكنتش اديتهم من وقتى كل ده حتى احترفهم​

​

بس الفكرة فين؟؟​

​

نرجع تانى نقول، لما يكون الفوركس هو مصدر اكل عيشك وفاتح بيتك بيكون همّك الأول والأخير هو الربح (بس بجد مش زى ما البعض بيدّعى) عشان كده مش مهتم بالحركات اللولبية والمستخبية، المهم الربببححححح​

​

فلما تلاقى انك ممكن تحقق الهدف المطلوب وبدون وجع راس واستعراض حاجات غريبة وعجيبة لجذب الانتباه، فأكيد انت مش هاتعذب نفسك هههههه​

​

المهم​

​

وده بجد المهم​

​

ويمكن أهم من الموضوع الأساسى​

​

يا ريت يا إخوانى تاخدوا كلامى ده على محمل من الجديّة​

​

إوعى تخلّى حد يدير لك حسابك مهماً كان​

​

ولا حتى أنا​

​

وادينى باقولها بالبنط العرييييييييض​

​

ومش هاقبل اى حد ولا على الخاص ولا على العام​

​

وبكل صراحة​

​

اسأل نفسك أولا​

​

اذا بالفعل اللى هايديرلك حسابك بيربح الأرباح اللى قالك عليها​

​

هايدير حسابك لييييييييييييييييييييه؟؟؟؟؟؟؟؟؟؟؟؟؟​

​

يعنى بقى بعد ما ربنا فتح عليه باسلوب بيعرف يتاجر بيه لنفسه لدرجة انه تفرّغ من عمله واشتغل فوركس (مش بيقلّب عيشه بحاجة جانبية) يرجع يخلّى حد يحاسبه تانى ويراجع وراه وفين ده وليه ده، ويرجع تااااانى زى الشغل القديم (ده اذا كان هايشتغل بما يرضى الله)؟؟؟؟​

​

انما هو عامل حسابه انها فلوس زيادة، جابت أرباح هايقاسمك فيها، خسرت ربنا يعوض عليك بقى انا هاعمل لك ايه انت اللى نحس ههههههههه​

​

وانا عارف انه هايطلع واحد يقولى ماهو ممكن يكون عارف طريقة حلوة بس مافيش راس مال، أو فيه بس قليل وهو مستعجل​

​

صدقنى لو 100$ وماظنش ان المبلغ ده مش موجود، واستراتيجيته حلوة هايعمل منه اى راس مال كان بيحلم بيه​

​

بس الصبر​

​

فتااااااااانى اوعى تدى حسابك لحد مهما برهن لك على شطارته، ومش هاقول لك ورّالك ريبورت مضروب لا، ده لو اشتغل كل صفقاته قدامك لايف​

​

امال ايه؟؟​

​

إتعلّم واشتغل انت بنفسك​

​

قال الإمام على بن أبى طالب​

​

ما حَكّ جلدك مثل ظِفرك فتوَلَّ أنت أمر نفسك​

​

طيب ما عرفتش؟؟​

​

يبقى مش مجالك، ومش كل الناس تنفع تبقى دكاترة وجراحين مع انهم بياخدوا مئات الآلاف فى ساعتين جراحة، بس انت مش منهم ومش شغلتك، ولاعب الكرة اللى بالملايين، ماكانش حد غلب، وهو مين مابيعرفش يلعب كورة؟؟​

​

أظن انا المرة دى طولت عليكم بجد​

​

ده اذا كنتم لسه بتقرأوا اساسا وماسيبتوش الموضوع ومشيتم​

​

أشوفكم على خير بالليل (وياريت اللى يدخل الموضوع جديد ويشوف المشاركة دى يقرأ الموضوع من اوله لآخره عشان ده موضوع مسلسل ومايجيش فى النص يسأل عن حاجة اتشرحت فى الأول)​

​

[font=&quot]والسلام عليكم ورحمة الله وبركاته[/font]​

[font=&quot]**********[/font]

 

[zero_cool725]

ما هو سوق الفوركس؟​

​

الحركة التى يسميها بعض الناس بال (عشوائية) انما هى فى منتهى الانتظام والتكامل المتناهى لمن يستطيع الإلمام بها​

​

فأنا أشبهها مثل التروس المتشابكة والمختلفة الأقطار (أنا حاسس ان انا متكتّف فى اللغة الفصحى دى بس نحاول نكمّل
​

​

فعندما ندير الترس الكبير لفّة واحدة يدور الترس الأصغر منه مثلا 4 لفّات حتى تكتمل الدورة الواحدة للترس الكبير​

​

وبالتالى يدور الترس الثالث وهو الأصغر من الثانى والمتصل به حوالى 40 دورة كاملة خلال هذه الدورة الواحدة للترس الأكبر​

​

ويارب اكون استطعت اوضح فكرتى​

​

فعندما نقول مثلا أن زوج كذا سيصعد 500 نقطة على الشارت اليومى (الترس الكبير مثلا)​

​

فمن الممكن أن يهبط أولاً السعر 50 نقطةعلى فريم ال 4 ساعات قبل ان يرتد صعودا 200 نقطة وثم يهبط 50 آخرين ثم يصعد وهكذا حتى يصل لل 500 نقطة وهى هدف الشارت اليومى​

​

وخلال هذه الحركة على مستوى 4 ساعات والتى نلاحظ انها بدأت بالهبوط أولاً، نجد على شارت الساعة انه كان هناك هبوطاً سابقاً وكل الاشارات تدل على استكمال الهبوط (وكمان بالتأكيد مع الفريم الأكبر منه وهو ال 4 ساعات يدل على هبوط بسيط)​

​

وبذلك نأتى للمحصلة​

​

من يدخل على فريم الساعة متسدلاً على الاتجاه بفريم ال 4 ساعات يقول ان حاليا هبوط (وهو صحيح) واذا دخل بيع يكسب 50 نقطة (اللى قلنا عليهم سابقا)​

​

والذى يدخل شراء على فريم ال 4 ساعات مستدلاً باليومى للإتجاه فهو محق، وسيكسب 200 نقطة ولكن بعد ارتداد 50 نقطة أولاً​

​

وهكذا​

​

فخلال ما يكون الترس الأكبر اتجاهه لأعلى يكون الاصغر منه اوقاتاً لأعلى وأوقاتاً لأسفل، والاصغر منه اعلى وأسفل بصورة أسرع وهكذا حتى تكتمل الدورة​

​

ومن هنا يأتى التذبذب​

​

وكل ما سبق هو اساس فكرة اليوت والموجات، وغيره من الناس اللى مجرد فسروا السوق فى كلام منمّق وليس اختراع، انما هى مجموعة ملاحظات من تصرّف السعر وصاغوها فى اسلوبهم فقط​

​

ولذلك ينصح كل الخبراء بالسوق الابتعاد عن الفريمات الصغيرة لشدّة التذبذب ولعدم وضوح الاتجاه، وطبعا سمعنا ان كلما زدنا فى الفريم كلما تكون العملة اكثر طوعاً واحتراماً وأقل تأثراً بالمتغيرات كالأخبار وغيره​

​

ولكن...​

​

الفريم الكبير يكون هدفه كبير صحيح ولكن استوب كبير ايضا بالنسبة للأصغر منه​

​

ففى المثل السابق​

​

من يدخل على فريم الساعة يكون هدفه 50 نقطة واستوب 20 نقطة فقط​

​

أما من يدخل على ال 4 ساعات فاذا وضع نفس الاستوب يكون وصل له مع الارتداد 50 نقطة، فلابد ان يرتفع الاستوب وليكن 100 نقطة وبذلك لابد ان يرتفع الهدف فيصبح 250 نقطة​

​

وكذلك اليومى لمن سيحاول أخذ ال 500 نقطة كلهم، فلن يضع استوب 20 ولا 50 فيسجد نفسه يستخدم استوب كبير للوصول للهدف الكبير​

​

طيب اى الفريمات افضل؟؟​

​

انت الذى يحدد ذلك​

​

حسب عدة أشياء منها​

​

- تفرّغك للفوركس: من الممكن ان تكون متابع جيد ووظيفتك هى الفوركس فبذلك ليس لديك مشكلة فى هذه النقطة، ولكن من الممكن ان تكون لديك وظيفة أخرى وليس لديك متسع من الوقت الا ساعة يوميا مثلا فبالتالى لن يستقيم معك فريم الساعة ولا ال 4 ساعات، وهكذا​

​

- العامل الثانى هو رأس المال: فليس من الممكن ان يتم العمل على فريم يومى براس مال 200$ مثلا، المقصود كلما كبُر راس المال زادت الصلاحية للفريمات الكبيرة (ولكن ليس بالضرورة العمل عليها) انما اصبح متاحاً العمل على الفريم الكبير​

​

نعود ثانيةً الى السؤال ما هو الفوركس؟؟​

​

السوق شىء من اثنين لا ثالث لهما​

​

اما تذبذب (عرضى) أو اتجاه واضح (ترند)​

​

وطبعا المقصود بالاتجاه سواء صاعد ام هابط المهم انه اتجاه واضح المعالم​

​

وكل الذى ينفع مع اوقات التذبذب يفشل مع الترند والعكس صحيح​

​

فعلى سبيل المثال لا الحصر​

​

مؤشرات التشبع وهى مثل آر إس آى، واستوكاستيك، وسى سى آى، وغيرهم تصلح تماما مع التذبذب حيث تُظهر متى سيرتد السعر وهل هو فى مرحلة تشبع بيع ام تشبع شراء​

​

ولكنها مدمّرة فى اوقات الترند حيث انها تتشبع تماما (شراء مثلا) فيبيع المتاجر، ثم يكمل السعر صعودا ضارباً بالمؤشر عرض الحائط، فيبدأ المؤشر بتعديل نفسه ويهبط خلال ما السعر يرتفع لكى يستعيد المؤشر عزيمته، ثم يرتفع المؤشر مرة أخرى حتى مراحل التشبع فيبيع المتاجر مرة اخرى ظاناً ان السعر اكتفى.... ولكن هيهات، فيظل السعر فى الاتجاه حتى يأتى على كامل الحساب​

​

ومن هذه المؤشرات أيضاً البولنجر باندز فعند الاتجاه يلمس السعر الحد العلوى عدة مرات فى كل مرة يبيع المتاجر ويرتفع السعر ليلمس الحد العلوى مرة اخرى وهكذا​

​

ومن هنا انبثقت استراتيجيات عديدة كلها للتحايل على هذا الوضع​

​

فمنهم من قال البيع لا يكون الا باغلاق شمعة فوق الحد العلوى للبولنجر وليس ملامسته​

​

او الذى اتجه الى الشراء عند تشبع المؤشرات بالشراء (أى العكس)، وبالفعل يكسب بهذه الاستراتيجية ويفتح لها الورشة بل ويتجه البعض انه اكتشف السر وكيف كان يتلاعب السوق بنا​

​

ولكن كل ما هناك انه كان فى فترة الترند فكان عند تشبع المؤشر شراء يشترى ويصعد السعر (على عكس اخونا السابق من يستخدم المؤشر مظبوط) ولكن أول ما يهدأ السوق ويعود لطبيعته فيصبح المؤشر فعّالاً يجد المتاجر نفسه يشترى من اعلى نقطة ويبيع من اقل نقطة​

​

أما النظام الآخر​

​

فهو الترند​

​

ونجد المؤشرات التى تتوافق معه على سيبل المثال لا الحصر أيضاً​

​

الموفنج افريدج، الايشيموكو، المومينتوم وهكذا​

​

فلنأخذ الموفنج كمثال​

​

استراتيجية تقول البيع عند اغلاق شمعة تحت موفنج كذا والشراء عند الاغلاق فوقه​

​

جميل جدا فى فترة الترند​

​

فعند الاغلاق فوقه (أيا كان رقم الموفنج، ولو كان رقمك المفضّل او حتى رقم تليفونك) سيستمر السعر فى الصعود، ليس بسبب الموفنج والاغلاق فوقه، ولكن بسبب انه ترند صاعد، وستكون المكاسب كبيرة (هذا اذا صبر المتاجر على الأرباح)​

​

ولكن نجد انه فى وقت التذبذب من الممكن ان تغلق شمعة فوق الموفنج فيشترى المتاجر والشمعة التى تليها تغلق تحته فيغلق الشراء على خسارة ويبيع، وبعد شمعتين بالعرض تغلق شمعة فوق الموفنج فيحتار المتاجر​

​

ومن هنا ظهرت عدة اساليب للتحايل على هذا السيناريو أيضا​

​

فمنهم المضاعفات (وما أدراك ما المضاعفات) فيقول فى كل مرة يتذبذب السعر ندخل بضعف عدد اللوت السابق فى الاتجاه المعاكس وهكذا الى ان يفرجها ربنا ويمشى السعر بعيدا عن الموفنج يعوّض كل الخسائر السابقة​

​

ومنهم من قال ان موفنج واحد لا يكفى بل هو تقاطع 2 موفنج لتأكيد الدخول (ونفس النتيجة الحتميّة للأسف)​

​

ومنهم من عمل توليفة من 3 او 4 موفنج​

​

والله انا رأيت بعينى استراتيجية تعتمد على 16 موفنج مختلفين لدرجة ان السعر لما يعد يُرى بالعين المجردة (بس ألوانها عجبتنى)​

​

كلللللللللل هذا ما أسمّيه بالتحايل​

​

الموضوع وااااااضح​

​

هناك وقت للتذبذب ومؤشرات لهذا الوقت لاتنفع مع غيره فلا تستعملها بالعافية​

​

وهناك وقت للترند ومؤشرات تنفع معاه فلا تستعملها مع غيره​

​

يبقى السرّ!!​

​

وهو كيفية معرفة الوقت الحالى ترند ولا تذبذب حتى نعمل بالطريقة المثلى له​

​

واذا عرفت... فكم ستطول هذه المدة حتى نغير الاستراتيجية؟؟​

​

وهذا ليس سراً، انما فكرة التروس السابقة، مع فكرة الظلام السابقة أيضا​

​

فحاول أن تجمّع كل ما سبق من خبرات سوياً حتى ترى الصورة أوضح​

​

**********​

​

 

[zero_cool725]

بسم الله الرحمن الرحيم
اولا مرفق كل المؤشرات و التمبلت المستخدم
نبدأ التطبيق العملى​

أولا
شرح مبسط للتيمبلت عشان جاتلى فيه اسئلة على الخاص
شمعة السعر اللى الاغلاق فيها اقل من الافتتاح بتكون لونها احمر
واللى الاغلاق فيها اكبر من الافتتاح لونها اخضر​

فيه خطوط منقطة بالطول ودى ذات اهمية قصوى
دى بتسمى (Period Separator)
يعنى فاصل لكل فترة
لو انت على فريم الساعة بيكون الفاصل ده كل يوم (بتوقيت البرنامج بتاعك)
ولو نقلت على فريم ال 4 ساعات بيكون الفاصل ده كل اسبوع
ولو انتقلت لليومى هايكون الفاصل كل شهر
اما لو انت فى مدرجات الدرجة التالتة هايكون الفاصل اعلانى​

دى حاجات بدائية جدا ولكن بالفعل الناس سألونى فيها
ولكن مهم شرحها عشان هانستخدمها بعد شوية​

نيجى بقى للمهم
عاوزين تركيز من فضلكم
فيه اداة فى البرنامج اسمها
Linear Regression Channel
ودى المسئولة عن رسم قناة على عدد شموع معينة
طيب ولو الأداة دى مش موجودة عند فى التوول بار؟
نعمل الاتى
ندوس بالماوس الزرار اليمين على أداة رسم خط الترند
ونختار من القائمة اللى هاتطلع
Customize
ونختار من اللستة على الشمال الأداة اللى قلنا عليها وندوس
Insert
هانلاقيها بقدرة قادر بقت على اليمين
وندوس اوك​

كده الأداة بقت موجودة عندنا على طول فى التوول بار​

لحد كده فيه أى استفسار؟؟​

يتبع ...​

**********​

​

 

[zero_cool725]

جميل​

​

الأداة دى بقى بتعمل ايه؟​

​

دى بترسم قناة اوتوماتيك على الشموع اللى انت بتحددها​

​

يعنى ببساطة بتعمل حاجة شبه الترند على متوسط الشموع اللى انت بتختارها فى فترة معينة​

​

طيب ايه الفايدة؟​

​

أولا انت مش بترسم الترند بإيدك فلا مجال للخطأ، أو انى أقولك بعد شوية لأ دانت راسم على قمتين مش صح، ولا الترند مش ماشى على الذيول مظبوط​

​

ثانيا دى بتعمل قناة يعنى مش ترند بس لا، دة كأنه ترند من فوق ومن تحت، فبتدى فرصة يا اما تتداول داخل القناة على الارتدادات، او تتداول على كسر القناة اما من فوق أو من تحت​

​

طيب كل ده كويس​

​

تعالى بقى نستخدمها​

​

أولا هانخلينا على عملة واحد وفريم واحد مبدئيا لما نخلص سوا تبقى تغير اللى انت عاوزه​

​

هانختار عملة الكيبل (الباوند دولار) وفريم الساعة​

​

ثانيا نختار الأداة من التوول بار (ماهى بقت موجودة خلاص)​

​

وتيجى على اليوم اللى قبل اللى انت عاوز تختبره وتعمل دراج (يعنى تدوس بالماوس وتشد من غير ماتسيب) من اول اليوم لحد آخره (من الشمال لليمين)​

​

وطبعا انت معاك الفواصل يعنى هاتسهل لك كل حاجة​

​

مثال​

​

لو انت عاوز تختبر اللى حصل النهاردة مثلا (النهاردة 3 مارس)​

​

هاتيجى على امبارح (2 مارس) وترسم بالأداة من أوله لحد آخره (من الفاصل للفاصل)​

​

وياريت نكون مستخدمين برنامج متوافق مع توقيت مصر (جرينتش +2) عشان ده اللى انا شغال عليه بقالى 6 سنين الوقتى لأن لو اختلف التوقيت هاتختلف الشموع خلال الفواصل فهايختلف شكل القناة والله اعلم هايحصل ايه تانى​

​

ماشى كده لحد الوقتى ولا فيه أسئلة؟​

​

مافيش؟​

​

طيب تمام​

​

نعمل دبل كليك (ندوس مرتين) على خط المنتصف فى الخطوط اللى اترسمت بالأداة عشان يتم الاختيار​

​

وندوس يمين بالماوس ونختار ​

​

Properties​

​

او الخواص ​

​

ومنها نختار الاتى​

​

من التاب الأول هانسيب الاسم زى ماهو مش فارقة​

​

ونختار اللون ​

​

Indigo​

​

أو أى لون يعجبك بس انا باقول عشان توحيد الشارت فى الفرص بعد كده ان شاء الله​

​

وتعلّم صح على الاختيار​

​

Draw as Background​

​

وده بيخلى الخطوط المرسومة تظهر على شكل مستطيل ملون بدلا من خطوط فارغة​

​

وبعدين تنقل على التاب التانى واسمه ​

​

Parameters​

​

وتعلّم صح على ​

​

Ray​

​

وده بيخلى الخطوط ممتدة مش لحد آخر اليوم وخلاص​

​

وأخيرا تروح على التاب التالت واسمه​

​

Visualization​

​

وتشيل علامة الصح من على ​

​

Show on All Timeframes​

​

وتحط صح على ​

​

H1​

​

وبكده يظهر اللون فى فريم الساعة فقط عشان الباقى له نظام تانى​

​

وتدوس اوك وبالهنا والشفا​

​

طيب هل لحد كده فيه أى استفسار قبل مانكمل؟!!​

​

يتبع ...

​

​

**********​

​

 

[zero_cool725]

تمام جدا جدا كده
تعالى نشوف بقى
هى الأداة واحدة ولكن يختلف شكلها باختلاف الشموع التى تحتويها
ومن هنا تيجى اختلافات الاستخدام

يعنى لما نلاقى شكل زى الكيبل النهاردة مثلا (اللى هو موجود قدامكم)
من قبل ما اليوم يبتدى خالص
خلى بالك ان الأداة مرسومة على شموع امبارح وأول امبارح
يعنى أولا مافيهاش غلط فى الرسم ده اوتوماتيك
ثانيا تحديد لليوم الجديد ومن قبل ما يبتدى يعنى مش خلال اليوم
ثالثا امتداد الرسم بيرسم ملامح اليوم الجديد

زى ما قدامنا فى الشارت تخيل ان مافيش شموع لسه النهاردة بس فيه امتداد الألوان
هانقول على بتاع امبارح اللى يحتوى يوم واحد بس (الأحمر) و اللى يحتوى يومين (الأزرق) عشان نقدر نتابع مع بعض
الأحمر والأزرق بيتخذوا عدة أشكال مع بعض (كل يوم بيومه) وكمان عدة تخانات (سواء عريض أو رفيع) وكمان عدة اتجاهات (فوق وتحت وبالعرض) وكل توليفة ولها التعامل الخاص بتاعها

هانلاقى النهاردة عبارة عن ان الأحمر متوسط السمك ومتجه لأعلى والأزرق عريض (تخين) وماشى بالعرض شوية
الحالة اللى زى دى لما السعر يخرج من الأحمر يبقى هاينزل فى الغالب لحد لما يلمس حد الأزرق السفلى او بنسبة غالبة منه

فيكون الدخول بيع من بعد اغلاق شمعة كسر الحد السفلى للأحمر والتارجت نقول تقريبا 80% من المسافة بين الأحمر والحد السفلى للأزرق (ده لحد لما نعرف ازاى ان السوق اكتفى كما قلنا سابقا)
والمثال كما فى الصورة

وزى مانتم شايفين بعد ما كسر رجع عمل اعادة اختبار زى اى ترند ونزل بعدها

وده كان مثل حى النهاردة وتابعنا الصفقة لايف وهى شغالة

​

 

[zero_cool725]

ودى بعض الأمثلة كما طلبوها الإخوان
أيام 28 فبراير (ويارب تكون عرفت الحركة دى كانت ليه يا عنتر) واكون وفيت بوعدى ليك
ويوم 1 مارس و2 مارس

أما يوم 28 يا عنتر
فالسعر خرج من الاتنين الأحمر والأزرق وهم شبه منطبقين وبكده السعر بينطلق انطلاق كبير زى ما شوفته
طيب كبير يعنى اد ايه؟؟
هانقول ده واحنا بنحسب التارجت ازاى
بس واحدة واحدة

وللتجربة كل ما عليك انك تدوس على النقطة اللى فى منتصف (الأحمر) أو (الأزرق) وتسحبه على قبل اليوم اللى انت عاوز تختبره وتشوف ايه اللى حصل

مع العلم انى ما شرحتش غير شكل واحد فقط
انما هناك أشكال تانية بس بصراحة انا مش قادر كده تانى النهاردة عشان باتابع من 7 الصبح

ولو فيه اى استفسارات عن اللى اتشرح اكتبوها وانا هارد عليها كلها بكرة باذن الله
والآن مع الصور

**********

 

[zero_cool725]

نرجع و نكمل شرح بقى
اولا الى بقوله ده برضه على لسان الدكتور


لازم تعرف الأدوات اللى فى ايدك كويس اوى وامكانياتها قبل ما تستعملها
عشان تقدر تستعملها صح، وبكامل طاقتها، وعشان تتلافى عيوبها، وتبعد عن أضرارها.. مش كده ولا ايه

الأداة اللى معانا دى عبارة عن ايه؟
عبارة عن ترند داخلى (بداخل الشموع) وبعدين معمول خط بنفس زاويته علوى وخط تانى بنفس زاويته سفلى، يبعدا عنه بمقدار أكبر بعد لذيول الشموع عن الخط الترند الأصلى

نفهم ايه من الرغى الكتير ده؟
ان الأساسى فى الموضوع هو الخط الوسطانى لأنه هو ده الترند بتاعنا
وعشان كده كما تفضل الاستاذ جان (الجديد) بالشرح، اذا فضل السعر يلمس ويتراجع ومش قادر يكسر خط المنتصف بيعكس

خلى بالك ان الموضوع عبارة عن توليفة من الحاجات مش مجرد خرج تقوم تشترى او تبيع

فيه حاجة مهمة عاوز اقولها النهاردة
ازاى نوصل بالثقة فى الصفقة قبل الدخول حتى نصل الى 100% عشان نقدر ندخلها

مافيش حاجة اسمها 100%
أمال ايه؟ مش هاندخل ولا صفقة؟؟
لا
انما فيه حاجة اسمها الثقة المتراكمة
بمعنى
لما السعر كسر الأحمر مثلا لفوق (زى ما مصطفى والاخوان المحترمين أشاروا فى الشارت) ده بيدينا ثقة انه (احتمال) يكمل طلوع، وكمان (احتمال) يصل للحد العلوى الأزرق
بس هل تكفى كمية الاحتمالات دى عشان ادخل الصفقة؟؟ طبعا لا
امال نعمل ايه؟
مثلا الاحتمالات دى خليتنا واثقين بنسبة 30% ان الاتجاه صعود
طيب ده لسه كتير اوى فاضل 70%
ندخل على الفريم الأكبر عشان نعرف احنا فين من الخريطة (ده هايتشرح بالتفصيل فى مشاركة تانية النهاردة برضة باذن الله) فلو كان الفريم الأكبر يؤكد الصعود زادت النسبة مثلا ل60%
لسه فاضل 40 (اخلص بقى امال هاندخل امتى؟)
لما نلاقى سلوك السعر (وده أهم حاجة فى الفوركس وهو ده القائم عليه اى استراتيجيات او ملاحظات، انت اساسا بتلاحظ سلوك السعر، وكل اللى بنعمله ده ناتج عن ملاحظات لسلوك السعر، فماتخليش الملاحظات تحجب رؤيتك لسلوك السعر الأصلى)
بمعنى، لما مثلا يكون الكسر بقوة فده دليل على انه مكمل بقوة باذن الله
حتى لو عمل اعادة اختبار
انما لما يكون السعر ما بيتدلع زى الكسر اللى عمله الكيبل النهاردة مش هادخل الا لما تكون فيه اشارة تأكيدية
يعنى مثلا رجع عمل اختبار ورد بقوة شوية
نزل شوية لحد ما خبط فى دعم سابق
عمل شكل شمعة من بتوع الصعود (هامر محترمة ولا بيرسينج ولا بولش انلجلفينج ولا حاجة من دول)
المهم يكون فيه تأكيد من سلوك السعر نفسهمثلا وصلنا كده لل 90%
فاضل حاجة بسيطة ويمكن الاستغناء عنها (احنا وصلنا ل 90 بلاش طمع) ودى هايكون شرحها قداااام شوية بعد ما نتمكن من الأداة دى عشان مانتوهش، كمان ممكن نقدر نشتغل من غيرها (بس هاتتقال برضة ماهو كل شيج انكشفن وبان)

المهم
عاوزين الرزانة
عاوزين يبقوا الاخوان هاديين وراسيين فى الدخول
نقطة الدخةل لما بتكون صح بتريح المتاجر
ويقدر يقسّم على السوق براحته
انما لما بتكون غلط والعياذ بالله
بيبقى مش عارف يعمل ايه
هل يعزز؟ هل يقفل على خسارة بسيطة؟ ولا يعمل هيدج ويستنى؟ وطول ماهو قاعد يلوم نفسه ايه اللى دخلنى، ويلوم اللى عامل الموضوع (اللى هو انا) وفى الآخر يلوم الفوركس انه نصب
ادخل صح حتى لو تستنى كذا يوم من غير متاجرة (انا عارف ان ده صعب للمدمنين) انما اقرا استراتيجية المسطرة (هنا فى المنتدى اعمل بحث هاتلاقيها) قديمة شوية بس حلوة
فحاول تسيطر على شعورك وادخل من نقطة صح
واحد رد على مصطفى خالد فى موضوع سابق ليه وقاله كلمة حكمة
"انا باستنى السوق لما يتحايل عليا عشان ادخل"
فعلا كده
يوم زى امبارح
انت صحين من النوم مثلا لقيت فرصة بيع الكيبل فاتتك بس هو لسه ماوصلش للحد السفلى للأزرق
فانت عشان مايروحش اليوم من غير ماتفتح صفقة قمت بايع من النص
فلما الكيبل طلع الطلعة القوية دى انت خسرت كتير فقفلت بسرعة عشان ده تغيير اتجاه فراح مكمل نزول للهدف الحد السفلى وانت خسرت

يعنى شوف اللى حصل
انت عارف الاتجاه
وعارف رايح لحد فين
ومع لك خسرت
ليه؟ عشان دخلت غلط

تعالى نشوف اللى دخل صح
لو دخلت الفرصة من اولها هاتقسّم وتبيع وتشترى وتلعب لعب ماعملهوش ابو تريكة
لو صحيت متأخر زى أخينا الأولانى بس انت عاقل، قلت مش هادخل صفقة من النص، وبناقص النهاردة، بس بتتابع برضة، مش بناقص النهاردة وتقفل الجهاز (على الأقل تشارك معانا هنا فى الموضوع
فلما طلع الكيبل الطلعة دى انت استغليتها وبعت (تقريبا انت بعت للراجل الأولانى اللى خاف وقفل)
ونزل بيك لحد التارجت المعروف

يبقى يا اخوانى
الدخول الصح بيريح المتاجر
أدخل بسبب (ولو عرفت تكتب السبب يبقى كويس ليك)
وكمااااااااااان
أخرج بسبب

زى مانا هاخرج الوقتى بسبب ان ايدى نمّلت من كتير الكتابة

اشوفكم بعد قليل (لما النمل يمشى من عليها)

**********

 

[zero_cool725]

طيب​

​

عاوزين بقى نعمل شغلانة تانية​

​

هانجيب شارت ال 4 ساعات (كيبل طبعا احنا مثبتين عليه) وبعدين نعمل نفس اللى عملناه فى شارت الساعة بنفس الأداة ونفس الألوان بس مع تغيير حاجتين​

​

أولا انك تختار فى خانة​

​

Visualization​

​

انها تظهر على ال 4 ساعات​

​

يعنى تعمل صح على خانة​

​

4H​

​

وثانيا​

​

هانرسم برضة بنفس المنطق على الفواصل​

​

ولكن الاختلاف هو قيمة الفواصل​

​

اللى هاتشير المرة دى الى اسبوع واسبوعين بدلا من يوم ويومين​

​

وفى الحالة دى هانرسم الكلام ده مرة فى الاسبوع عشان نحدد ايه اللى هايحصل خلال الاسبوع ده باذن الله​

​

وبناء عليه نقدر نحدد هانعمل ايه على مستوى الساعة​

​

يعنى​

​

رسمنا على ال 4 ساعات مع بداية يوم الاثنين الرسمة بتاعتنا​

​

وبعدين لقينا السعر عند حد القناة السفلى مثلا على ال 4 ساعات​

​

وروحنا على الساعة لقيناه بعد شوية عمل كسر للأحمر لفوق بقوة​

​

يبقى انت عاوز ايه تانى عشان تدخل؟​

​

على الحد السفلى لل 4 ساعات (يعنى اسبوع بحاله شرا) و كسر على الساعة الأحمر يعنى شرا برضة، والكسر كان بقوة او اعادة اختبار ارتدت بسرعة، يعنى سلوك سعرى موجب​

​

يبقى تدخل انت كمان بقوة وانت مستريح الضمير ههههه​

​

تاخد ربحك وتحمد ربنا وبعدين تقفل الشارت وبعدين تيجى تفرحنا هنا، وبعدين تقفل الكمبيوتر، وبعدين تقوم تشوف حياتك بقى انا مش هاقولك تعمل ايه فى كل حاجة​

​

يبقى دة كده يورينا الشكل الاسبوعى ممكن يبقى عامل ازاى​

​

والتفاصيل الدقيقة مع شارت الساعة​

​

مثل عملى (بس اعملوا شارت ال 4 ساعات الأول عشان تتابعوا معايا)​

​

ده شكل الكيبل على ال 4 ساعات عشان يوضح شكل الاسبوع اللى جاى هايحصل ايه​

​

هانلاقى انه اول الاسبوع مابتدى نزل شوية صغيرة لحد لما لمس الحد السفلى للأزرق​

​

تمام؟​

​

وبعدين راح طالع بقوة وعمل شمعة بولش انجلف (مش مهم تكون عارف فى الشموع اوى) المهم انه ارتد لما لمس الحد السفلى للأزرق​

​

كل ده احنا مالناش دعوة​

​

كل ده فى انتظار الصفقة الصح​

​

بلاش ايدك تاكلك​

​

نقوم داخلين على شارت الساعة بقى بتاعنا​

​

هانلاقيه شكله زى اللى فى الصورة​

​

حصل ايه؟؟​

​

كان الاحمر والأزرق فوق بعض تقريبا، وعرضهم متوسط نوعا ما، وده من أقوى الأشكال اذا اتكسر​

​

وراح السعر كاسر الاتنين بقوة​

​

ورجع عمل اختبار وشوف راح فين​

​

مع ان اليوم ده تلاقى ناس كتير بتعيط وعمالة تكتب انها خسرت جزء كبير من حسابها او الحساب كله​

​

وانت تحمد ربنا زى ماقلنا على نعمته ان كسبت مكاسب محترمة جدا فى اليوم اللى الناس بتشتكى انه صعب جدا جدا​

​

وبعدين​

​

الناس كلها لما شافت الطلعة القوية جدا اللى حصلت (اللى احنا عارفينها من قبل ما يبدأ الاسبوع من فريم ال 4 ساعات ولله الحمد واخدناها من اولها لآخرها) بعد ما شافوا اللى حصل قالك ده ترند صاعد و و وهانستناه عند كذا وما حدش يبيع الكيبل واللى يبيع ده مجنون​

​

يقوم ييجى يوم زى امبارح​

​

على شارت ال 4 ساعات السعر تقريبا وصل للحد العلوى للأزرق (يعنى اكتفى صعود، فاكرين التروس؟، عاوزين نصحى مع بعض)​

​

وعلى شارت السعة فى نفس الوقت كسر الأحمر لتحت وعمل اختبار، تقوم حضرتك عامل اييييه؟؟ باااايع​

​

فى الوقت اللى كله بيقول شرا شرا شرا​

​

تاخد منه حظك وتحمد ربنا (ماتنساش دى)​

​

مع العلم انك لسه عارف انه على ال 4 ساعات مكمل صعود شوية، فماتفتريش فى النزول اوى عشان هايردهم تانى​

​

ومن هنا تبقى قادر تتابع موضوع التروس المتداخلة قدر الامكان​

​

من خلال معرفتك الاسبوع هايحصل فيه ايه، وللدقة من خلال الساعة على اليوم هايحصل فيه ايه​

​

والأداة دى ولا هاتغلط وانت بترسمها، ولا بتعيد رسم نفسها مع السعر )عشان هى بتترسم على سعر قديم مش متغيرة مع الجديد) ، وبترسملك طريقك لقدام​

​

وممكن كمان تعيد نفس اللى عملناه على الشارت اليومى بنفس الشكل​

​

وده عشان تقدر تحدد الشهر ده هايكون نظامه ايه عامة، قبل ماتدخل فى التروس الأصغر​

​

طبعا اكبر من كده يبقى افترا بقى، مش معقول عاوز تعمله على شارت الاسبوعى عشان تعرف السنة اللى جاية هايحصل ايه ههههههه​

​

ده كان اقصى آمال الناس انها تعرف الشمعة بتاعت الساعة اللى جاية طالعة ولا نازلة وعملوا 100 مؤشر و 100 موضوع لده​

​

فلما يكون اقل حاجة عندك انك تعرف يوم بحاله هايحصل ايه (قدر الامكان طبعا عشان ده غيب، انما محاولات) فحلو اوى اوى اوى وتحمد ربنا على نعمته​

​

انا مش عارف ايه موضوع النمل ده انا عاوز ابقى أرشّ​

​

أشوفكم على خير​

​

**********​

​

 

[zero_cool725]

ادارة راس المال​

الموضوع ده لا يقل اهمية عن الاستراتيجية
بل هو جزء لا يتجزّأ منها​

أنا عن نفسى وكل واحد يشتغل بلإسلوب اللى يريحه، انا مجرد باشرح اسلوبى ومابالزمش بيه حد​

فلنفترض ان راس مالك 25000 دولار (خمسة وعشرين الف عشان اللخبطة فى الاصفار)
فانا بادخل بلوت واحد بس استاندرد
يعنى 10 لوت مينى
يعنى لوت 1 مينى لكل 2500 دولار
يعنى لوت 1 مايكرو لكل 250 دولار
انا حاسس انى فى فرح هههه​

وكمان مش بادخل باللوت كله الا اذا كانت الصفقة جايبة نسبة 100%
صفقة زى بتاعت النهاردة عشان تبقوا متابعين معايا
انا شخصيا عملت ايه؟
طبعا السعر على ال 4 ساعات مش لامس ولا كاسر اى حاجة عشان نقول طلوع جامد زى اول الاسبوع (شرحناه قبل كده)
وعلى الساعة شكله تعبان وكسر الأحمر كسرة مش اد كده
انما انا دخلت برضة
بس بأد ايييييييه؟؟
وارجع لمشاركتى هاتلاقينى كاتب داخل بلوت قليل، صح؟
ماقلتش اد ايه عشان ماكناش شرحنا ادارة راس المال​

انما انا بادخل كل صفقة حسب نسبة نجاحها (ومانصحش حد يعمل كده الا لو كان متمكن او حسابه كبير، يفضّل الانتظار حتى تكتمل كل الشروط)​

فانا ال 100% بتاعتى بادخل زى ماتفقنا ب 10 عقود مينى لكل 25 الف
ولكن انا دخلت فى صفقة النهاردة عشان نسبتها قليلة ب عقد واااااحد مينى لكل 25 الف
وبعد الارتداد الى 250 ولمس ترند ال 4 ساعات الاوسط قلت ندخل بنصف العقود
يعنى 5 لوت مينى
يعنى هانزود 4 على اللى داخلين بيه اساسا
فيبقى المجموع الحالى
1 لوت من سعر 286
و 4 لوت من سعر 250​

تعالوا نحسبها سوا
مجمل الخسارة الحالية والسعر الوقتى وانا باكتب 238
1 لوت =-50
4 لوت =-48
يعنى توتال حوالى 100$ من أصل 25 الف !!!!!!!!
آدى حاجة
الحاجة التانية لو انت خوفت من التريدة
أو بانت اشارات هبوط
او اى حاجة تانية
يكفيك ان السعر يطلع 8 نقاط فقط عشان تقفل الكل على صفر
ده لو انت مش عاوز الصفقة دى
8 نقاط​

اما لو نزل تانى مثلا
فهاشترى ال 5 لوت اللى فاضلين عشان ابقى مجموع كللللللل اللى عملته 1 لوت استاندرد لكل 25 الف دولار
منتهى ادارة راس المال
والفكرة دى احقاقا للحق مستوحاه مع بعش التعديلات من موضوع واحد محترم جدا زمان كان فاتح موضوع توصيات على الكيبل فقط اسمه الاستاذ
الدُبعى​

طيب واحد هايقولى ان كده الموضوع مش هايبقى جايب همّه كنسبة وتناسب
لا نحسبها
خلينا انك ما بتاخدش غير الصفقات ال 100% بس يعنى مش بتلقّط رزقك من هنا ومن هنا​

هل مش هاتلاقى صفقتين بس 100% فى الاسبوع؟ ده بدون اى تلقيط
هاتلاقى اكتر من كده بكتييييير ممكن واحدة واتنين فى اليوم مش فى الاسبوع
انما خلينا هم 2 فى الاسبوع
كل واحدة تاخدلك 100 نقطة (داحنا امبارح بس ولايف عاملين ييجى 200 طالع نازل)
انما هانقول 100 نقطة فى صفقتين يعنى 200 نقطة فى الاسبووووووووع (خليها علينا)
يعنى حوالى 800 نقطة فى الشهر (ده لو كان كل الشهور 4 اسابيع بس انما برضة خليها علينا)
لما تكون داخل ب عقد مينى لكل 2500 دولار يعنى النقطة بدولار
يبقى فى الشهر مكسب 800 دولار من أصل 2500 يعنى اكتر من التلت كل شهر (ده واحنا جايين على نفسنا كتير)
ومع ذلك قمة الأمان
عشان انت داخل من نقطة المفروض 100% عشان تدخل بالعقد كله
فهل بعد ال 100% هايرجع عليك 2500 نقطة؟؟؟؟​

فانا مش هاحسبهالك فى السنة كام عشان ماتتخضش ولا هادخل الأرباح فى دورة راس المال عشان مايغماش عليك
انما هاقولك على حاجة صغيرة
البنك لو انت حاطط فيه بالمصرى بيديلك نسبة 7% فى السنة (ياخى عيب اوى اللى يقول المكسب كده قليل احنا بنقول حوالى 40% فى الشهرررر)
اما لو حاطط بالدولار بتاخد ما شاء الله نسبة 1.75% فى السنننننة
يعنى لو حطيتهم فى الدولاب هاتفتح اخر السنة هاتلاقيهم زادوا عن كده​

وممكن التعزيز (اللى هو التبريد عشان ماحدش يزعل منى) بلوت تانى ده اذا ارتد عليك تانى اكتر
وده مابيحصلش الا اذا انت داخل غلط خالص من الأول
ومع دخولك غلط
ادارة راس المال ممكن تطلعك من الورطة دى​

عموما اى استفسار انا فى الخدمة
بس بلاش هجوم عشان انا باقول كل اللى عندى
ولو انت مش عاجبك اللى انا باعمله مافيش اى مشكلة ممكن تشوف موضوع تانى او حتى تفتح موضوع تفيدنا باللى انت بتعمله
انما هجوم ليه؟؟
انا ما خسرتكش حاجة​

شكرا لكم​

**********

 

[zero_cool725]

أولا
الشغل على فريم الساعة فقط
امال ال 4 ساعات ده ايه؟
ده مجرد يفهمك الاتجاه العام وللتأكيد على الاستمرار فى الصفقة (على الساعة) أو الخروج منها (على الساعة برضة)
وبيورينا التخيل العام للاسبوع (ممكن) يبقى شكله ايه (مش بالضرورة)
انما اللى بيحدد الشكل الفعلى هو فريم الساعة وتغير سلوك السعر خلاله​

امال اليومى بقى؟
ده عشان نتخيل برضه شكل الشهر (احتما يبقى ازاى)
وتأكيده يكون من ال 4 ساعات
وتأكيد ال 4 ساعات من خلال الساعة​

يعنى هاديلكم مثل
احنا هانبتدى شهر جديد
عملنا نظامنا على فريم اليومى عشان نتخيل الشهر
فلقينا (حاجة من الاتنين بس اللى اتشرحوا ماعندناش غيرهم الوقتى) ان الأحمر والأزرق متطابقين على بعض ونازلين لتحت
فى الحالة دى يبقى عندنا سيناريو من اتنين خلال الشهر ده​

يا اما هايمشى فى ترند هابط يلمس القناة من فوق وينزل يلمسها من تحت
او هايكسرها من فوق ويطلع بهبل​

طيب نعرف ازى؟
ندخل على ال 4 ساعات ونعمل نظامنا عادى
نلاقى الشكل فى الغالب هايكون شبه اليومى (عشان بقاله فترة نازل)
فيكون السيناريو هو هو احدى الحلّين​

نقوم ندخل على الساعة ونعمل نفس النظام
ودى تكون محطة المراقبة بتاعتنا
ممكن نلاقى الساعة نفس الشكل (الأحمر والأزرق متطابقين برضة) فيكون نفس السيناريو
او يكون السعر مشى بالعرض شوية (بحيث تأثيره ظهر على الساعة ولكن لسه على ال 4 ساعات مش مؤثر اوى)
فيكون الشكل على الساعة ان الأزرق ماشى بالعرض شوية والأحمر باصص لتحت​

الطبيعى عندنا اننا بنشتغل على الساعة مع وضع الحال العام فى الاعتبار
فلما يكسر الأحمر على الساعة لفوق يبقى هاندخل شرا (ده العادى) ولكن الاتجاه العام على اليومى وعلى ال 4 ساعات هبوط فيكون الدخول اما بلوت صغير عشان تقدر تعزز او بتارجت صغير (مش لازم يلمس الحد العلوى للأزرق)​

ملحوظة هااااامة
ماتخافش ان الترند يعكس اتجاهه من بيع الى شرا وانت كنت شارى وقفلت بدرى
لا
هايرجع وينزل لك تانى لمنطقة الشراء الأصلية أو أفضل منها كمان قبل ما يبتدى رحلة الصعود
يعنى هاتركب الموجة هاتركب الموجة باذن الله تعالى
فبلاش تستعجل او تطمع وما تقفلش الصفقة عشان هايعكس الترند ويطلع
مافيش ترند بيتعكس خبط لزق، لازم فترة انتقالية الأول
والاستراتيجية بتاعتنا دى بتبين كل الفترات، الترند والانتقالى
بس انت
أدخل صحححححح​

المهم
زى ما قلنا اشترينا على الساعة مع كسر الأحمر (على استحياء)
وبعدين تانى يوم مثلا هايتغير الشكل بتاعنا (عشان امبارح طلع السعر شوية)
فهايكون الأزرق ماشى بالعرض وتقريبا الأحمر ماشى باعرض برضة بس باصص لفوق​

نركز هنا بقى
فيه 2 سيناريو​

السيناريو الاول
لو الترند العام هايكمل هبوطه​

هايبقى السعر على ال 4 ساعات مثلا لامس الحد العلوى للقناة
وعلى الساعة حبيبتنا
هايكسر الأحمر لتحت، فهاندخل بيع وبقوة (لوت عالى) ليه؟
اليومى هابط وماتكسرش
ال 4 ساعات لمس الحد العلوى وارتد وترند هابط
الساعة كسر الأحمر لتحت
عاوز ايه تانى؟​

السينايو التانى
يكون الترند هايبتدى ينعكس
فالسعر على الساعة هايكسر الأحمر لفوق (لتانى يوم)
فهاندخل شرا (لسه على استحياء بس مش استحياء اوى زى امبارح ههههه)
هايطلع بينا شوية (يمكن يكون بقوة)
فى الحتة دى هايكون كسر الحدين العلويين للقناتين المتطابقتين على ال 4 ساعات
يبقى ساعتها يا فرج الله الاسبوع ده هايكون طلوع بغباوة وفيه ناس كتير هاتصفّر حساباتها (المتمسكين بالبيع) نحاول احنا نكسب بقى ​

ساعتها السعر هايعمل زى ما قلنا من شوية
هاينزل تانى ويمكن لسعر أفضل من اللى اشترينا على أول ما كسر
وده عشان يعمل اختبار على ال 4 ساعات قبل ما ينطلق
ويمكن على الساعة نلاقيه دخل تانى جوة الأحمر اللى لسه كاسره
(من هنا ييجى دور ال 4 ساعات فى تحديد الاتجاه وليس فى المتجرة)​

طبعا احنا مش هانشترى من تحت اوى (بلاش افترا ههههه) وبلاش تخييييل (تاجر ما ترى وليس ما تظن)
الشرا وبمنتهى القوة يكون لما السعر يرجع ويطلع تانى من الأحمر على الساعة
ويكون تم التأكيد على اختبار فى ال 4 ساعات (والحاجتين دول متزامنين يعنى بيحصلوا سوا)​

يعنى لما يرجع يكسر على الساعة بيكون فى الغالب عمل شمعة هامر او بولش انجلف على ال 4 ساعات مع لمس القناة المكسورة والارتداد منها​

يبقى اشترى ولا حرج
والا سبوع ده هايطيييييير لفوق ​

هايكون عندنا الشكل كالتالى
على ال 4 ساعات القناتين باصين لتحت ومتطابقتين والسعر خرج منهما وطار (الفريم ده كده مالناش دعوة بيه تانى لآخر الاسبوع عشان الشكل ده مش هايتغير)
اما على الساعة فأول يوم لما السعر كسرهم وطار هايبقى الشكل شبه ال 4 ساعات
اما تانى يوم فهايكون الأحمر باصص لفوق ورفيع ومخترق الأزرق من شدة طلوع السعر (أكيد يعنى) والأزرق عريض وبيبتدى يبص لفوق
فلو السعر هايكمل بنفس القوة (وده فى الغالب)
ممكن يلمس الأحمر من تحت ويطلع بقوة
وممكن يكسر الأحمر لتحت (ده شكل جديد غير اللى فاتوا) خلى بالك
هايكسر الأحمر لتحت (ادينى باعيدها تانى) ويلمس طرف الأزرق من فوق ويطييييير يطير زى العصافيييير​

طيب ليه لما هايكسر لتحت مش هانبيييييع؟؟
اولا احنا مش مكنة (اجهزة يعنى بس بالمصرى)
ثانيا احنا قايلين انه على ال 4 ساعات اخد فى وشه ومسافر لدرجة اننا مش هانبص عليه تانى باقى الاسبوع
يعنى كل نزول شرا
وعلى فكرة
غير موضوع ال 4 ساعات انه طالع
الشكل نفسه بتاع الساعة ما بيبقاش هو هو
يعنى الأحمر بيكون رفيع عن العادى وخارج عن الأزرق اوى (لقوة الشموع الصاعدة المرسوم عليها)​

عموما
الشرح النظرى شىء
ولما تجرب عملى وبإيدك والخبرة شىء تانى خالص، وده اللى احنا عاوزين نوصل له
وما تفتكروش انى قلت الكلمتين اللى عندى ومش هاتابع الموضوع زى ما ساعات الناس بتعمل
احنا باذن الله مع بعض وهانتابع سوا ونتعلم سوا لحد ما تنتقل لكم الخبرة باذن الله​

وعلى فكرة
ممكن قدام شوية بعد ماتكتسبوا الخبرة
من أول ما ترسموا النظام بتاعنا من بالليل ومن شكل الأحمر مع الأزرق
تقول انا بكرة أجازة وتستمتع بحياتك
ولما ترجع بالليل تلاقى اللى انت كنت عارفه
انه مشى بالعرض فى رينج ضيق (نبقى بعدنا عن التذبذب)
او انه غير محدد الملامح (على الساعة طالع وعلى ال 4 نازل واليومى بالعرض) فلما تيجى بالليل تلاقى ناس فى المنتدى بتعيط انه ليه عمل كده او ان فيه مؤامرة ضد أموال العرب
فتحمد ربنا (تانى ماتنسهاش دى)​

معلش ان الشرح من غير صور
بس محتاج شوية تخيّل
فيارب تكون الصورة الكاملة وضحت​

انا كده خلَّصت، وخِلِصْت​

**********

 

[zero_cool725]

شرح السلوك السعرى باستفاضة
وكيفية ربط الشارتات ببعضها

النقطة دى من اهم النقاط ولكن من الصعوبة الوصول اليها عشان محتاجة معايشة للسعر وخبرة فى الشارت والسلوك السعرى
فاللى مش هايقدر يعمل ده مش مهم بس يحاول معاه ومايهملوش لحد لما يتمكن منه

عشان توصل للموضوع ده لازم تكون ملمّ بكل اللى اتقال قبل كده
الشارت الاكبر هو الاتجاه العام للشارت الاصغر
والشارت الاصغر هو كيفية الوصول لهذا الاتجاه العام
يعنى الاصغر مرسوم له خط سيره من الشارت الاكبر
والاكبر بيترسم فعليا من خلال الشارت الاصغر

مش فاهم، يعنى الفرخة من البيضة ولا البيضة من الفرخة
(اكيد الاتنين من بعض)

ازاى الكلام الغريب ده
نشوف مثل الكيبل النهاردة (أقرب حاجة)
الكيبل لما كسر الحد العلوى للقناتين واشترينا الصبح
الحمد لله صعد والناس عملت ربح كويس
بس لحد فين؟؟؟
وليه انا قلت فى مشاركة ان كده كفاية والناس تاخد ارباحها؟؟ مع ان فيه ناس كتير فى المنتدى قالت ان السعر لسه قدامه كتير
بل وبالعكس
انا بعت من هذه النقطة (على عكس الاستراتيجية المشروحة) بس مارضيتش اقول هنا عشان مايحصلش تشتيت
انما عشان اللى هايعترض او يقول انت بتفتى وبتشوف ايه اللى حصل الاول وبعدين تقول انت بعت ولا اشتريت (عشان ده حصل معايا قبل كده) انا ارفقت صورة من حسابى الحقيقى توضح فقط نقطة دخولى وانه بيع والتوقيت كمان

المهم
ليه انا بعت، او حتى ليه قفلنا الشرا؟
هاتلاقى ان شارت اليومى السعر قرب من الحد العلوى للأحمر (وده كده يعتبر مقاومة شهرية)
على شارت الساعة ابتدى السعر يُظهر انه مش قادر يطلع تانى (السعر على فكرة صاحبنا، وعمره ما بيخون حد، انما احنا اللى مش بنعرف لغته ولا بنسمع تنبيهاته)
السعر كان ماشى بقوة لحد الساعة 11
ولكن من الساعة 12 ابتدى يبقى ضعيف
وقفلت الساعة 12 على شكل اسمه اسبينينج توب، وده مش عاكس للاتجاه ولكن بيدل على الضعف
خلى بالك وماتنساش احنا قلنا السعر موجود فين على اليومى (عاوزين نربط كل الشارتات ببعضها)
لما تيجى الساعة 13 وتعمل شكل (فى رأيى من أفضل الاشكال العاكسة وانا عن نفسى باستخدمه كتير وقلنا عليه بسرعة سابقا) وهو اسمه فولنج اوف ذى رووف (أو السقوط من السطح) وهو ده اللى حصل بالفعل بعدها
يبقى مستنى ايه عشان تبيع؟

شرح مبسط لهذا الشكل القوى
فولنج اوف ذى رووف
هو عبارة عن شمعة تكون الهاى بتاعها اكبر من هاى الشمعة اللى قبلها ولكن تعكس وتقفل على كلوز اقل من كلوز اللى قبلها
ودى غير شوتنج ستار اللى مش لازم تكون الهاى اعلى من اللى قبلها ولا الكلوز اقل

وكلما بقى الهاى اعلى (يعنى تعمل ذيل طويل من فوق) وكلما كان الكلوز اقل (يعنى تبقى حمراء طويلة) تكون الوقعة اللى بعدها اكبر ههههه

المهم
نرجع نربط الشارتات تانى
لما السعر على الساعة عمل شكل الشمعة اللى شرحناه، بعد ما عمل اسبينينج توب مع وجود السعر على مقاومة شهرية
يبقى بيع
وفعلا السعر نزل
خلال ما السعر بينزل هنا شمعة ال 4 ساعات لسه بتتكون (اللى بيكونها هو شموع الساعة، التى بالتالى تتكون من خلال شموع الربع ساعة وهكذا)
فلما شمعة ال 4 ساعات اكتملت وقفلت نبص نلاقيها عاملة اييييييه؟؟؟
برافو عليكم
عاملة فولنج اوف ذى رووف برضة بس على ال 4 ساعات
يبقى ده استمرارية فى النزول

ومن هنا ييجى الربط بين الفريمات
الفريم الكبير بيحدد ملامح الفريم الاصغر
بينما الفريم الاصغر هو اللى بيرسم فعليا هذه الملامح

وبس

يارب تكون الفكرة وصلت ووضحت للاخوان

**********

 

[المسلم أمره لله]

و عليكم السلام و رحمة الله وبركاته
أهلا أخي الكريم منور
شرح جميل لكن لا بد من القراءة مرة و اثنين بالنسبة لي لأني على قدي لاستعاب المحتوى بالشكل الصحيح
فضلا لا أمرا أخي الغالي لو تكرمت شارتات توضيحية ليكتمل الموضوع و تسهل المتابعة مع فرص لايف
بارك الله فيك و متابعين معك باذن الله

 

[abdelmoniem]

اخى العزيز ارجو منك وضع صور للتوضيح

 

[zero_cool725]

اوكى ان شاء الله
هنطبق لايف مع بعض
بس انا عاوز انوه انى الشرح ده بتاع اخ كريم من منتدى الجيران شم بتاعى
انا بس نقلت الاستراتيجية الى هشتغل بيها

 

[dr.ahmed]

الاستراتيجية رائعة ومجربة سابقا وناجحة جدا ..
اتمنى لك التوفيق ..

 

[zero_cool725]

ده مثال لايف مثلا
الدخول على الباوند دولار بيع من النقطة الحالية عند 1.4685
حيث اننا نلاحظ كسر حد القناة الحمراء
الهدف حد القناة الزرقاء او وجود اى سلوك سعرى يوحى بتغير الاتجاه
طبع الصفقة دى مش معايا فى المسابقى لانى متعلق بعقد بيع على المجنون من امبارح


الصور للى عاوزين صور فى المرفقات

 

[zero_cool725]

ده مثال لايف مثلا
الدخول على الباوند دولار بيع من النقطة الحالية عند 1.4685
حيث اننا نلاحظ كسر حد القناة الحمراء
الهدف حد القناة الزرقاء او وجود اى سلوك سعرى يوحى بتغير الاتجاه
طبع الصفقة دى مش معايا فى المسابقى لانى متعلق بعقد بيع على المجنون من امبارح


الصور للى عاوزين صور فى المرفقات

اسف الصفقة دى على اليورو دولار بس حصل عندى لبس